ಚೀನಾ ಅಧ್ಯಕ್ಷರಿಗೆ ಜೀವನಪರ್ಯಂತ ಅಧಿಕಾರ: ಸಂಸತ್ ಐತಿಹಾಸಿಕ ನಿರ್ಣಯ
ಬೀಜಿಂಗ್: ಚೀನೀ ಅಧ್ಯಕ್ಷರ ಅಧಿಕಾರಾವಧಿಯನ್ನು ಅನಿರ್ದಿಷ್ಟ ಕಾಲ ಮುಂದುವರಿಸುವ ಐತಿಹಾಸಿಕ ನಿರ್ಣಯವನ್ನು ಚೀನೀ ಸಂಸತ್ತು ಕೈಗೊಂಡಿದೆ. ಆರ್ಥಿಕ ಮತ್ತು ಮಿಲಿಟರಿ ಸೂಪರ್ ಪವರ್ ಆಗಿ ದೇಶವನ್ನು ಮುನ್ನಡೆಸಲು ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರಿಗೆ ಸರ್ವಾಧಿಕಾರ ದೊರೆತಿದೆ.
ಕಮ್ಯೂನಿಸ್ಟ್ ಚೀನಾದ ಸಂಸ್ಥಾಪಕ ಮಾವೋ ಜೆಡಾಂಗ್ ಅವಧಿಯಲ್ಲಿ ಪ್ರಕ್ಷುಬ್ದತೆಯನ್ನು ಕೊನೆಗೊಳಿಸಿ ಸ್ಥಿರತೆ ಸಾಧಿಸಲು ಡೆಂಗ್ ಕ್ಸಿಯೋಪಿಂಗ್ ಅವರಿಗೆ ಇದೇ ರೀತಿ ಅನಿರ್ದಿಷ್ಟ ಅವಧಿಯ ಅಧಿಕಾರ ನೀಡಲಾಗಿತ್ತು. ಆ ಬಳಿಕ ಇದೀಗ ಜಿನ್ಪಿಂಗ್ ಅವರಿಗೆ ಅಂತಹದೇ ಸರ್ವಾಧಿಕಾರ ದೊರೆತಿದೆ.
ರಬ್ಬರ್ ಸ್ಟ್ಯಾಂಪ್ (ಹೆಸರಿಗಷ್ಟೇ ಇರುವ) ಸಂಸತ್ತು ಅಧ್ಯಕ್ಷರ ಅಧಿಕಾರಾವಧಿಯನ್ನು ಅನಿರ್ದಿಷ್ಟ ಕಾಲ ಮುಂದುವರಿಸಲು ಸಂವಿಧಾನ ತಿದ್ದುಪಡಿ ಮಾಡುವ ನಿರ್ಣಯಕ್ಕೆ 2,958 ಮತಗಳಿಂದ ಅನುಮೋದನೆ ನೀಡಿತು. ಎರಡು ಮತಗಳು ನಿರ್ಣಯದ ವಿರುದ್ಧ ಬಿದ್ದರೆ, ಮೂವರು ಸದಸ್ಯರು ಗೈರುಹಾಜರಾಗಿದ್ದರು. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತು ವ್ಯಾಪಕ ಟೀಕೆಗಳು ವ್ಯಕ್ತವಾಗಿವೆ. ಹಾಗಿದ್ದರೂ ಸರಕಾರ ಈ ಟೀಕೆಗಳನ್ನು ಸೆನ್ಸಾರ್ಗೆ ಒಳಪಡಿಸಿದೆ.
ಇದುವರೆಗೆ ಚೀನಾ ಸಂವಿಧಾನದ ಪ್ರಕಾರ ಒಬ್ಬ ಅಧ್ಯಕ್ಷರಿಗೆ ಐದು ವರ್ಷಗಳ ಎರಡು ಅವಧಿಯನ್ನು ನೀಡಬಹುದಾಗಿತ್ತು.
14 ವರ್ಷಗಳಲ್ಲಿ ನಡೆದ ಮೊದಲ ಸಂವಿಧಾನ ತಿದ್ದುಪಡಿ ಇದಾಗಿದ್ದು, ಸಂಸತ್ತು ಹೊಸ ಶಾಸನ ರಚಿಸಲಿದೆ. ಚೀನೀ ಸಂಸತ್ತು ತನ್ನ ಇತಿಹಾಸದಲ್ಲಿ ಈ ವರೆಗೆ ಕಮ್ಯೂನಿಸ್ಟ್ ಪಕ್ಷದ ಆದೇಶಗಳನ್ನು ತಿರಸ್ಕರಿಸಿದ್ದೇ ಇಲ್ಲ.
0 Comments