ಚಂಡಮಾರುತದ ಬಗ್ಗೆ ನಿಮಗೆಷ್ಟು ಗೊತ್ತು?

ಚಂಡಮಾರುತ ಎಂದರೇನು?: 

ಚಂಡಮಾರುತಗಳು ವಾಯುಮಂಡಲದಲ್ಲಿ ಕಡಿಮೆ ಒತ್ತಡದ ಪ್ರದೇಶಗಳು ಸೃಷ್ಟಿಯಾದಾಗ ಅವುಗಳ ಸುತ್ತ ಚಕ್ರವ್ಯೂಹಾಕಾರದಲ್ಲಿ ಉಂಟಾಗುವ ಬಿರುಗಾಳಿ ಮತ್ತು ತೀವ್ರ ಮಳೆಯನ್ನು ಚಂಡಮಾರುತ ಎಂದು ಕರೆಯಲಾಗುತ್ತದೆ. ವಿಷುವುದ್ರೇಖೆಯಿಂದ ಸುಮಾರು 10 ಡಿಗ್ರಿ ದೂರದಲ್ಲಿ ಹೆಚ್ಚಾಗಿ ಇದು ಉಂಟಾಗುತ್ತದೆ. ಭೂಮಿ ತಿರುಗುವ ದಿಕ್ಕಿನಲ್ಲೇ ಇದು ಸುತ್ತುತ್ತದೆ.ಭೂಮಿಯ ಉತ್ತರ ಗೋಳದಲ್ಲಿ ಗಡಿಯಾರದ ವಿರುದ್ಧ ದಿಕ್ಕಿನಲ್ಲಿ ಚಂಡಮಾರುತ ಸುತ್ತುತ್ತದೆ. ದಕ್ಷಿಣ ಗೋಳದಲ್ಲಿ ಚಂಡಮಾರುತ ಗಡಿಯಾರದ ದಿಕ್ಕಿನಲ್ಲಿ ಸುತ್ತುತ್ತದೆ. ಕಡಿಮೆ ವಾಯುಭಾರ ಇರುವ ಪ್ರದೇಶಗಳಲ್ಲಿ ಹೆಚ್ಚಾಗಿ ದೊಡ್ಡ ಪ್ರಮಾಣದ ಚಂಡಮಾರುತಗಳೇಳುತ್ತವೆ.

ಸೈಕ್ಲೋನ್‌ , ಹುರಿಕೇನ್‌ , ಟೈಫೂನ್‌

ಅಮೆರಿಕದಲ್ಲಿ ಕತ್ರಿನಾ ಹುರಿಕೇನ್‌, ಫಿಲಿಪ್ಪೀನ್ಸ್‌ನಲ್ಲಿ ನಾರಿ ಟೈಫೂನ್‌ ಅಪ್ಪಳಿಸಿದ ಸುದ್ದಿಯನ್ನು ನಾವೆಲ್ಲ ಕೇಳಿದ್ದೇವೆ. ವಾಸ್ತವವಾಗಿ ಸೈಕ್ಲೋನ್‌ , ಹುರಿಕೇನ್‌ ಮತ್ತು ಟೈಫೂನ್‌ ಇವೆಲ್ಲವೂ ಉಷ್ಣವಲಯದ ಚಂಡಮಾರುತಗಳೇ... ಅಟ್ಲಾಂಟಿಕ್‌ ಮಹಾಸಾಗರದಲ್ಲಿ ಸೃಷ್ಟಿಯಾಗುವ ಚಂಡಮಾರುತವನ್ನ ಹುರಿಕೇನ್‌ ಎಂದು ಕರೆಯುತ್ತಾರೆ. ಪೆಸಿಫಿಕ್‌ ಮಹಾಸಾಗರದಲ್ಲಿ ಸೃಷ್ಟಿಯಾಗುವ ಚಂಡಮಾರುತವನ್ನ ಟೈಫೂನ್‌ ಎಂದು ಹೇಳುತ್ತಾರೆ. ನಮ್ಮ ಹಿಂದೂ ಮಹಾಸಾಗರದ ಚಂಡಮಾರುತವನ್ನ ಸೈಕ್ಲೋನ್‌ ಎಂದು ಸಂಬೋಧಿಸುತ್ತಾರೆ.

ಚಂಡಮಾರುತದ ಹೆಸರುಗಳು

ಪ್ರಸಕ್ತ ಚಂಡಮಾರುತಕ್ಕೆ ಫೋನಿ ಎಂದು ಹೆಸರಿಡಲಾಗಿದೆ. ವಿಶ್ವ ಪವನಶಾಸ್ತ್ರ ಸಂಘಟನೆಯು (ಡಬ್ಲ್ಯುಎಂಒ) ಪ್ರತಿ ವರ್ಷ ಅನುಕ್ರಮವಾಗಿ (ಆಲ್ಫಾಬೆಟಿಕಲಿ) 21 ಹೆಸರುಗಳನ್ನು ಪಟ್ಟಿ ಮಾಡುತ್ತದೆ. 1971ರಿಂದೀಚೆಗೆ, ಆ ಹೆಸರುಗಳನ್ನು , ಲಿಂಗಾನುಕ್ರಮಣಿಕೆಗೆ ಆನುಸಾರವಾಗಿ (ಒಮ್ಮೆ ಪುಲ್ಲಿಂಗ, ಇನ್ನೊಮ್ಮೆ ಸ್ತ್ರೀಲಿಂಗ ) ಕರೆಯಲಾಗುತ್ತದೆ. ಆದರೆ ಈ ಪಟ್ಟಿಯಿಂದ ಇಂಗ್ಲಿಷ್‌ ವರ್ಣಮಾಲೆಯ 'ಕ್ಯೂ', 'ಯು', 'ಎಕ್ಸ್‌ ', 'ವೈ ', 'ಝಡ್‌' ಅಕ್ಷರಗಳನ್ನು- ಬಹಳಷ್ಟು ಹೆಸರುಗಳು ಈ ಅಕ್ಷರಗಳಿಂದ ಪ್ರಾರಂಭವಾಗುವುದಿಲ್ಲ- ಕೈಬಿಡಲಾಗಿದೆ.

ನಾಮಕರಣಕ್ಕೆ ಮಾನದಂಡವೇನು?

( ಈ ಮೇಲಿನ ಐದು ಅಕ್ಷರಗಳನ್ನು ಹೊರತುಪಡಿಸಿ,) ಉಳಿದಿರುವ 21 ಅಕ್ಷರಗಳಿಂದ, ವಿಭಿನ್ನ/ ವಿಶೇಷವೆನ್ನಿಸುವ; ಚಿಕ್ಕದಾದ; ನೆನಪಿಡಲು ಹಾಗೂ ಉಚ್ಚಾರ ಮಾಡಲು ಸುಲಭವೆನ್ನಿಸುವ ಹೆಸರುಗಳಿಂದ ಕರೆಯಲಾಗುತ್ತದೆ.

ಸಮುದ್ರದಲ್ಲಿ ಆರ್ಭಟ ಹೆಚ್ಚು

ಸಮುದ್ರ ಪ್ರದೇಶದಲ್ಲಿ ಈ ಚಂಡಮಾರುತದ ತೀವ್ರತೆ ಗರಿಷ್ಠ ಪ್ರಮಾಣದಲ್ಲಿರುತ್ತದೆ. ನಾಡಿನತ್ತ ಬಂದಂತೆಲ್ಲಾ ಚಂಡಮಾರುತದ ತೀವ್ರತೆ ಕಡಿಮೆಯಾಗುತ್ತದೆ. ಹೀಗಾಗಿ ಸಮುದ್ರ ದಾಟಿ ಮೊದಲು ಸಿಗುವ ಕರಾವಳಿ ಭಾಗದಲ್ಲಿ ಚಂಡಮಾರುತದ ಪರಿಣಾಮ ಘನಘೋರವಾಗಿರುತ್ತದೆ. ಭೂಭಾಗದ ಒಳಬಂದಂತೆಲ್ಲಾ ತೀವ್ರತೆ ಕಡಿಮೆಯಾಗುತ್ತಾ ಹೋಗುತ್ತದೆ... ಆದರೆ, ಭೀಕರ ಮಳೆ ಒಳಪ್ರದೇಶಗಳನ್ನ ಬಾಧಿಸುವ ಸಾಧ್ಯತೆ ಇರುತ್ತದೆ